Swobodny stat Sakska

stolica: Drježdźany
přestrjeń: 18.415 km²
wobydlerstwo: 4.08 Mio

Sakska (němsce Sachsen) je zwjazkowy kraj na wuchodźe Němskeje. Hłowne město su Drježdźany, po ličbje wobydlerjow najwjetše pak Lipsk. Kaž hižo za čas Weimarskeje republiki mjenuje so Sakska oficielnje „swobodny stat“. Z něhdźe štyrjomi milionami wobydlerjow a přestrjenju wot 18.400 km² steji Sakska mjez 16 němskimi zwjazkowymi krajemi na srjedźnym městnje. Stawizniske jadro Sakskeho kurwjerchowstwa (wot 1806: kralestwa) bě w 10. lětstotku we wot Serbow wobsydlenym kraju załožene Mišnjanske markhrabinstwo. Jako jedyn z pjeć krajow na teritoriju Němskeje demokratiskeje republiki bu Sakska w lěće 1952 do wobwodow rozdźěleny. Po znowazjednoćenju lěta 1990 stwori so z něhdyšeju wobwodow Kamjenica a Drježdźany, najwjetšeho dźěla Lipšćanskeho a južneho dźěla Choćebuskeho wobwoda znowa kraj Sakska, kotryž so wot wokrjesneje reformy lěta 2008 do 10 wokrjesow a třoch bjezwokrjesnych městow rozrjaduje. (https://hsb.wikipedia.org/wiki/Sakska)

Čechi

stolica: Praha
přestrjeń: 52.065 km²
wobydlerstwo: wok. 6.000.000

Čechi (čěsce Čechy, němsce Böhmen) su jedyn z historiskich krajow Čěskeje. Rozpřestrěwaja so w zapadnym dźělu Čěskeje republiki. Jako stolica Čechow płaći Praha. Ze Čechami mjezuja na wuchodźe Morawa (344 km), na juhu awstriskej zwjazkowej krajej Delnja Awstriska a Hornja Awstriska, na juhozapadźe němski zwjazkowy kraj Bayerska, na sewjerozapadźe němski zwjazkowy kraj Sakska, na sewjerowuchodźe pólska Šleska. Čechi su na třoch bokach wobdate wot Čěskich namjeznych horin, ke kotrymž słušeja Šumawa na juhozapadźe, Šmrěčiny na zapadźe, Rudne horiny na sewjerozapadźe, kaž tež Łužiske horiny a Kyrkonoše jako dźěl Sudetow na sewjeru. Najwažnišej rěce w Čechach stej Łobjo a jeje najwažniši přitok, Wołtawa. (https://hsb.wikipedia.org/wiki/Čechi)